Дахин нэг завшаант сэтгэлгээг тайлбарлах нь

Крис Харн-ийн гэр бүл зуны амралтаараа Флорида мужийн Амелиа арал дээр очиж амраад гэртээ эргэж иртэл 5 настай хүүгийн орой унтахдаа тэвэрч унтдаг анааш Жошүа гэх нэртэй чихмэл тоглоомыг нь мартсан болохыг мэджээ. Хүү нь төрсөн цагаасаа л хойш орой унтахдаа тэр анаашийг өвөртлөн унтдаг байсан тул тэр орой сэтгэл нь тавгүйтэж унтахааргүй байсныг нь аав нь хараад хүүдээ: “Санаа зоволтгүй ээ, Жошүа, хэд хоног үргэлжлүүлж амрахаар шийдсэн юмаа. Тэр хэд хоног ганцаараа амарчхаад удахгүй араас хүрээд ирнэ” гэж хэлж ээ. Аавын хэлсэн энэ үгийг сонсоод хүү тайвшраад унтаж ээ. Маргааш нь аав нь зочид буудал руу утасдаж - “Манай хүүгийн чихмэл тоглоомыг бид мартсан байна. Олдвол бидэнд хэлэхгүй юу? хүү маань тэр тоглоомыг байнга өвөртөлж унтдаг юм” гэж хэлүүлжээ. Тун удалгүй зочид буудлын менежер эргэж утасдаад “танай хүүгийн тоглоом олдлоо. Та хаягаа өгвөл бид шуудангаар илгээе” гэхэд Крис Харн - “Танаас бас нэг жижигхэн зүйл гуйх гэсэн юм. Тоглоомыг илгээхдээ тэр анаашийг амарч байгаа мэт ганц зургийг нь аваад угаалгаад хамт явуулчихгүй юу” гэв. Зочид буудлын менежер уриалагхан хүлээн зөвшөөрч удахгүй илгээх болохоо мэдэгдэж ээ.

Ингээд хэд хоногийн дараа илгээмж нь ирсэн аж. Харин илгээмжийг задалтал дотроос нь анааш Жошүа болон нэг бус харин 20 гаруй фото зураг хамт гарч ирсэн гэдэг. Зураг дээр Жошүа анааш нэг бол далайн эрэг дээр сунадаг сандал дээр хар нүдний шилтэй биеэ наранд шарж буй байдалтай, аль эсвэл зочид буудлын бааранд коктейл ууж байгаа мэтээр авхуулсан олон зураг илгээсэн байж. Ритц зочид буудлынх нь сэтгэл гарган 5 настай хүүд зориулан Жошүа-ийн зургийг нь олон янзаар авч угаалган явуулсан аж. Ийм гэнэтийн бэлэг нь Крис Харн-ийн гэр бүлийнхийг асар их баярлуулсан нь тодорхой. Тэр дундаа 5 настай хүү хамгийн ихээр хөөрч чин сэтгэлээсээ баярласан гэдэг. Баярласан гэр бүл Ритц зочид буудлынханд талархсанаа илэрхийлж сонин хэвлэлд энэ түүхийг бичсэн бол тэр нь уншигчдын сэтгэлд хүрч олны анхаарал ч татаж чадсан гэдэг. Зочид буудлын үйлчилгээний сайн жишгийг олон байгууллагууд хуулбарлан дурайж байх ёстой наад захын жишиг болгосон гэдэг.

Харин дараагийн түүх бол Япон улсын иргэн ноён Такемура-тай түүнийг монгол байхад нь тохиолдсон түүх юм. Тэрээр Европын сэргээн босголт, хөгжлийн банкны (ЕСБХБ) жижиг дунд үйлдвэрүүдийн хөгжлийг дэмжих хөтөлбөрийн хүрээнд Монголд уригдаж ирсэн нэгэн. ЕСБХБ-ны уг хөтөлбөр нь жижиг дунд үйлдвэрүүдэд мэргэжлийн зөвлөгөө өгүүлэх зорилгоор тэтгэвэрт гарсан нарийн мэргэжлийн хүмүүсийг хамруулан ажилладаг аргачлалтай бол Такемура сан нь нүүрсний ашиглалтын чиглэлээр японы ган хайлшны хамгийн том компаниудын нэг болох Жапан Стил компанид 35 гаруй жил тасралтгүй ажиллаж байгаад тэтгэвэртээ гарсан олон улсын түвшний мэргэжилтэн байсан тул ЕСБХБ-ны уг хөтөлбөр түүнийг хөлслөн ажиллуулдаг байж. Иймээс түүнээс Монголын нүүрс олборлолтын компаниуд нарийн мэргэжлийн зөвлөгөө авах зорилгоор анх Монголд уригдсан гэдэг.

Такемура сан хөтөлбөрийн дагуу хөдөө явах байсан тул зочид буудлаасаа гарах үед буудлын тооцоо хийх гэтэл зочид буудлынх нь: “Та өрөөнийхөө баарыг ашигласан уу?” гэж асуухад: “үгүй” гэв. Зочны хэлснийг нягтлах зорилгоор давхрын өрөөний үйлчлүүлэгч рүү утсаар залгахад урдаас: “нэг лааз кола уусан байна” гэж хариулав. 70 гарсан настай япон хүн ганц нэг лааз ундаа уучхаад түүнийхээ үнийг төлөхгүй явчих гэсэн санаа агуулаагүй нь лавтай. Харин зочид буудлын үйлчлүүлэгчид өрөөний бааранд байсан ундааг ууж уусан ундааныхаа төлбөрийг хэл мэдэхгүй гаднынхнаар төлүүлэх гэсэн оролдлого байсан нь тодорхой болсон. Хэрэв өвгөн япон зочныг монгол залуучууд дагалдан яваагүй бол тэрээр мэдэлгүй л илүү үнэ төлөөд л явчих байсан байх. Харин хажууд нь монголчууд байж таарсан тул лааз коланы төлбөрийг өвгөнд тохож чадаагүй өнгөрсөн.

Хүний итгэл үнэмшил ямар ялгаатай үйлдэл хийхэд хүргэдгийг тайлбарлах зорилгоор энэ хоёр кэйсийг дурдсан юм. Эхний кэйс нь үйлчлүүлэгчийн сэтгэл ханамж чухал гэдэг итгэл үнэмшил дээр хүнээс гарч буй зан авир бол удаах нь Монгол хүний завшаант сэтгэлгээ харуулсан кэйс юм. Өмнө завшаант сэтгэлгээ гэж юу болох талаар тайлбарлаж байсан (https://tsetsenmd8.wixsite.com/leadership/post/монгол-хүний-сэтгэлгээний-онцлог).

Монголчууд бидний хөгжил дэвшилд саад болж буй гол хүчин зүйлсийн нэг бидний завшаант сэтгэлгээ юм.

Ийм учраас л шинэчлэл өөрчлөлт хийхэд шинэ санааг тусган авах нь асуудал бус харин хоцрогдож хуучирсан итгэл үнэмшлээс салах нь хамгийн хэцүү зүйл гэж хэлсэн байдаг.