Бизнес эрхлэх явцад Монголчуудад тулгардаг түгээмэл дөрвөн асуудал байдаг.
Бэлэн мөнгөний байнгын хомсдол
Цаг барих явдал
Хүний нөөцийн удирдлага
Үйл ажиллагааны удирдлага
Эдгээрийн эхний хоёр нь зан үйлтэй холбоотой бол сүүлийн хоёр нь ажлын арга барил дутуугийнх гэж тодорхойлж болно.
Манайд бэлэн мөнгөний хомсдолын улмаас компаниуд төлж барагдашгүй өр төлбөрт орсон байх нь илбэг. Тухайлбал, өнгөрсөн хугацаанд дампуурсан арилжааны банк, компаниудын түүх бүгд бэлэн мөнгөний удирдлагын чадварын дутуугаас болсон гэхэд буруутахгүй юм. Дампуурсан Ж... компани, жишээлбэл, бэлэн мөнгөний байнгын хомсдолын улмаас хөрөнгийн үнэлгээг ойр ойрхон хийх замаар компанийнхаа үнэлгээг нэмэгдүүлж арилжааны банкнуудаас зээл авч байсан ч сүүлдээ дотоодын банкнуудаас зээл авах боломж нь шавхагдсанаар төрийн өмчийн компаниудаар батлан даалт гаргуулж гадны банкнаас зээл авсан нь том асуудал болж дампуурахад.
Өрөнд орох асуудал нь хүний хэр ухаантай байхаас огт шалтгаалдаггүй. Сэтгэл зүйчдийн хэлснээр мөнгөтэй чадварлаг харьцах нь тухайн хүний эго-той урвуу харьцаатай байдаг. Эго их байх тусам мөнгө зарцуулах чадвар доройтох магадлалтай. Тухайлбал, гэртээ олон тооны мөнгөн аяга авч хураах нь тухайн хүн бусдад өөрийгөө хөрөнгөтэй гэдгээ л харуулах зорилгоор худалдан авсан байх талтай. Үүнтэй адилхан түүх олон бий. Мөн эсрэгээрээ даруу байх тусам мөнгө зарцуулах чадвар нь илүү байх магадлалтай.
Мөнгийг захирах чадвар нь эцсийн дүндээ хувь хүний зан үйлтэй холбоотой асуудал. Харамсалтай нь зан үйлийг зааж сургах нь (бараг боломжгүй биш юм гэхэд) асар төвөгтэй. Учир нь шинэ дадал төлөвшүүлэх шаардлагатай болдог.
Тиймээс мөнгийг зөв захиран зарцуулж сурна гэдэг нь ямар нэгэн ур чадвар сурдагтай адил хялбар сурчихдаг зүйл бус юм. Тухайлбал, мэргэжлийн нягтлан бодогч болоход хэдэн жил ажиллахад эрт орой гэхээс хэзээ нэгэн цагт чадварлаг нягтлан болж болно. Харин мөнгөтэй зөв харьцаж бол алдаж оносон ч сурахгүй байх боломжтой юм. Учир нь мөнгөтэй зөв харьцах асуудал нь мэдлэгээс шалтгаалдаг зүйл бус харин сэтгэл хөдлөлийг хянаж чадахаас илүүтэй хамаарна. Тиймээс мөнгөтэй холбоотой ухаалаг шийдвэрүүд санхүүгийн загвар, тооцоо чадварлаг гаргах гэхээс тухайн хүн сэтгэл хөдлөл багатай байж асуудалд хэр ухаалаг хандахаас илүүтэй шалтгаална гэж хэлдэг байна.
Comentários