Үлгэр:
Үнэг тогоруу хоёр нүхэнд хамт унажээ. Үнэг нүхнээс гарах арга сэдэх гээд л тойрч гүйгээд л байв. Тогоруу харин дуугүй хэсэг нэг зогсож байснаа: “хоёулаа яаж эндээс гарах уу?” гэж үнэгнээс асуухад үнэг хариуд нь: “надад мянган бодол байгаад байна аа, чи харин яах гэж байна?” гэв. Тогоруу: “надад ганц л бодол байна” гэж хариулжээ. “Ямар?” - гэж асуухад тогоруу: “Нисээд гарах” гэжээ. Ингээд хэсэг хугацаа өнгөрөхөд үнэг мянга бодлоо бодоод л гүйгээд байж. Нэлээд хүлээсний эцэст тогоруу тэвчээр алдаад ганцаараа нисээд явчихсан бол үнэг мянган бодолтойгоо нүхэндээ хоцорсон гэдэг.
Хүн хүнд цохилтонд орох, эсвэл хүнд асуудалтай тулгарахаар үнэгтэй адил олон юм бодно. “Яагаад надтай ийм юм болчихоо вэ?”, “яаж энэ хүнд байдлаас гарах вэ?”, “надад ямар ашигтай, сул тал нь юу юм? давуу тал нь юу байж болох уу? ямар эрсдэлтэй юм?” гэх мэт. Нэг ёсондоо “яавал дээр вэ?” гэж боддог. Энэ тохиолдолд “бодоод, бодоод бодын шийр дөрөв” гэдэг зарчим үйлчилдэг байна.
Гэтэл хүнд бэрхшээл тулгарах үед “яавал дээр вэ?” гэж бодох бус харин “би хэн болох ёстой вэ?", "би хэн болохыг хүсэж байгаа вэ?” гэсэн асуулт өөрөөсөө асуух нь илүү ач тустай. Өөрөөр хэлбэл “миний юу болохгүй байгаад би ийм асуудалд орчихсон бэ?”, “би яаж өөрчлөгдөх ёстой вэ?”, “өөрчлөгдлөө гэвэл би ямар хүн болох ёстой вэ?” гэдгээ бодвол хүнд цохилтоос хурдан гарч тулгарсан асуудлаа илүү шийдэж чаддаг байна.
Jamie Dimon нь Америкийн хамгийн том банкны нэг болох JPMorgan банкны захирлаар олон жил ажилласан нэгэн. Санхүүгийн хямрал болох үед олон банкнууд дампуурч байхад тэрээр банкаа авч гарч чадсан төдийгүй ашигтай ажиллаж чадсанаараа олны дунд танигдсан. Jamie Dimon нь 42 настай байхдаа Citibank-наас хөөгдөж байсан түүхтэй. Бүтэн жил ажилгүй байх хугацаандаа энэ үйл явдлын талаар их бодсон гэдэг бол ихэвчлэн “би ямар манлайлагч болох ёстой вэ?” гэдгийг л их эргэцүүлэн тунгаасан гэдэг. Үүний үр дүнд шилдэг удирдагч болж чадсан гэж үздэг юм байна.
Comments