Ажлын таатай орчин гэдэг нь шинэ барилга, шинэ тоног төхөөрөмж бүхий орчныг хэлдэггүй

Залуучуудыг тогтвор суурьшилтай ажиллуулах нь амаргүй асуудал болох нь өмнөх постуудаас тодорхой харагдсан байх. Тогтвор суурьшилтай ажиллах нь олон хүчин зүйлээс шалтгаалах бөгөөд удирдлагын зүгээс манлайлах ур чадварыг ихээр шаарддаг. Үүнээс хийх гол дүгнэлт нь ажилчдын тогтвор суурьшилтай ажиллах нь ажилчдаас шалтгаална гэхээс удирдлагын ур чадвартай холбоотой асуудал гэж үзэх нь бодит байдалд илүү нийцэх юм.

Менежер хүний үндсэн үүрэг нь хамгийн ерөнхий байдлаар ердөө хоёр юм.

• Нэгдүгээрт, тулгарсан асуудлаа чадварлаг шийдвэрлэх.

• Хоёрдугаарт, ажилчдаар хийвэл зохих ажлыг нь үр дүнтэй хийлгүүлэх явдал. Энэ үүргийг биелүүлэхийн тулд бусдад үр дүнтэй нөлөөлөх буюу манлайлах чадвартай байхыг менежерээс шаардагдана.

Бид өнөөдөр ажлыг захиргаадалтын нийгмээс уламжлан ирсэн аргачлалын дагуу хийдэг. Уг аргачлалын үндсэн шинж нь “буруу үйлдэл хийж алдаа гаргавал шийтгэж харин зөв үйлдэл хийвэл урамшуулна” гэсэн зарчим дээр суурилсан аргачлал юм. Үүнийг манлайллын онолд “лууван ба савааны модны” аргачлал гэнэ. Яагаад захиргаадалтын аргачлал гэж байгаа вэ? гэвэл бидний удирдах аргачлал нь “дарга нь үүрэг өгнө, ажилчин нь өгсөн үүргийг биелүүлэх үүрэгтэй” гэж ойлгодогтой холбоотой юм. Товчхондоо бол бид “дарга үүрэг өгнө, ажилчид биелүүлнэ” гэсэн итгэл үнэмшил дээр тулгуурлан “лууван ба савааны модны”аргачлалыг ашиглаж ажлыг хийх гэж оролддог. Энгийнээр бол дарга үүргийг өгч, ажилчид нь биелүүлбэл урамшуулж байдаг алдаа гаргавал шийтгэж байдаг гэсэн үг юм.

“Лууван ба саваа модны” аргачлалын дагуу ажилчдад нөлөөлөх гэсэн хэлбэрүүдийн ганц нэгийг дурдвал дараахаар байж болох юм.

• Ажил дээр амжилт гаргавал одон медалиар шагнах, мөнгөн урамшуулал олгох

• Хүндэт самбар байршуулах замаар хүлээн зөвшөөрсөн байдлыг харуулах

• Албан тушаалаар дэвшүүлэх

• Ур чадварын хувьд өсгөх зорилгоор сургах

• Алдаа гаргахыг урьдчилан сэргийлэх зорилгоор хяналтын тогтолцоо бий болгох

• Хувийн үзэмж дээр суурилсан даргын харьцаа

• Цалин гэх мэт

Ажлын эдгээр арга барилыг бүхэлд нь үгүйсгэх нь мэдээж туйлшрал болно. Ямартай ч эдгээр арга барил нь 60, 70 болон оныхонд л хагас дутуу үйлчилдэг гэвэл нэг их буруудахгүй юм. Харин шинэ үеийн 90 оноос хойш төрсөн залуучуудад ажлын ийм арга барил нь бараг л нэмэргүй байгаа гэвэл бодит байдлаас хол буухгүй юм. Шинэ үеийн залуучуудын итгэл үнэмшлүүд нь өөр учраас сэтгэлгээ нь дагаад өөр. Тэдний үнэт зүйлс нь одон медаль авах, зургаа хүндэт самбарт байршуулах гэх мэтийн хоцрогдсон арга барилаас огт өөр зүйлд байгаад гол асуудал юм. Иймээс шинэ үеийн залуучуудтай үр дүнтэй ажиллахын тулд өөр арга барилаар ажиллахгүй л бол хуучин арга барил огт үр дүнгүй гэдэг нь тодорхой.

Монгол хүн шинэ зүйлд суралцахгүй байна гэж хөндлөнгийн ажиглагчид шүүмжлээд байгаагийн нэг үндэслэл нь дээр дурдсан хуучирсан арга барилаас салж ажлын шинэ арга барилд суралцахгүй байгаатай холбоотой. Бид шинэ нөхцөлд хуучин арга барилаараа л ажиллах гээд үзээд байгаа юм.

Хүн ямар тохиолдолд ажилдаа тогтвор суурьшилтай ажиллах вэ? гэвэл тухайн ажлын орчин нь таатай байх юм бол л тууштай ажиллах сэдэлтэй болж байдаг гэсэн хариултыг өгдөг. Гэхдээ ажлын орчныг таатай болгоно гэхээр шинэ тоног төхөөрөмж, шинэ байр гэхээс хамт олны уур амьсгал эерэг байх нь илүү чухал юм. Таатай уур амьсгал гэхээр найзан дундаа болсон ажил хэргийн бус орчныг хэлж байгаа бас биш юм. Хэдийгээр хүмүүсийн хандлага чухал ч хандлагаас гадна ажлын таатай орчин бүрдүүлэхэд дараах зүйлс чухал үүрэгтэй байдаг байна. Үүнд:

1. Хувь хүний хийх ажил нь тодорхой байх: - өдөр тутмын зорилтууд нь тодорхой байх учиртай гэж ойлгох зөв юм.

2. Хийж гүйцэтгэсэн ажлын талаар шууд удирдлага нь үнэлгээгээ өгч зөв буруу болсныг нь хэлж өгдөг дадалтай байх: - хүн ажлаа зөв, буруу хийж байгаа мэдэх нь чухал байдаг.

3. Ур чадвар ба хийх ажил нь тэнцвэртэй байх: - хэрэв өгч байгаа ажлын ачаалал нь ур чадвараас нь хэт хол давсан байх юм бол хүний ажил хийх сэдэл ба сонирхол амархан үгүй болж байдаг.

4. Алдаа гаргахаас айхгүй байх нөхцөлийг бүрдүүлэх;

5. Хүлээлт маш тодорхой байх;

6. Гарч байгаа шийдвэрүүдийн тайлбарыг цаг алдалгүй өгч байх;

Дээрх шинжүүдийг ажлын байран дээр бүрдүүлж чадах юм бол ажилчид таатай нөхцөл бүхий ажлын орчин хэмээн үздэг байна. Таатай байх гэдэг зарчим асар чухал. Эс тэгвээс залуу хүнд ажилдаа ирэх, ажлыг тогтвор суурьшилтай хийх сэдэл нь өдөр өдрөөр л устах болно.