(Daniel Goleman-ны Focus The Hidden Driver of Excellence номноос)
“Тэр, томоохон хуулийн пүүсийн үүсгэн байгуулагчийн нэг нь, ажилчдаа бухимдуулж тэвчээрийг нь барахдаа гарамгай: компанийн бүх жижиг асуудалд оролцоно (micromanagement), байнга шүүмжилнэ, хэчнээн төгс бичсэн байсан ч “өөрийнх нь жишигт нийцэхгүй байна” гэх нэрийдлээр дахин дахин бичүүлнэ гээд хүний тэвчээр барсан ажлын арга барилтай байж. Ажилчдаа хэзээ ч магтаж урам өгдөггүй, ямагт ямар нэгэн шалтгаан олж шүүмжилнэ. Тогтмол сөрөг зүйлийг л олж харна. Тэгснээрээ ажилчдыг урмыг хугалж багийн сэтгэл зүйг үгүй болгож байдаг байж. Үр дагаварт нь чадварлаг ажилчид нь ажлаас гарсан бол бусад нь өөр хэлтэс нэгж рүү шилжсэн байдаг” (D.Goleman, 2013, Focus, The Hidden Driver of Excellence).
“Ийм төрлийн менежерүүдийг хэмнэл тогтоогчид (pacesetters) гэж тодорхойлно. Утга нь тэд өөрсдийн үлгэр жишээгээр бусдад дурайвал зохих жишгийг тогтоож байна гэж эндүүрдэгтэй холбоотой. Тэдний ажиллах зарчим нь тушаал өгөөд араас нь дарамтлах (command and coerce) явдал. Өөрөөр хэлбэл тэд бодохдоо би шилдэг тушаал өгнө ажилчид нь харин миний өгсөн тушаалыг үг дуугүй төгс биелүүлэх ёстой гэж боддогтой холбоотой.
Ийм төрлийн удирдагчид нь богино хугацаанд бага зэргийн ахиц гаргаж чаддаг ч алсдаа байгууллагаа дампууруулахад л хүргэдэг. Учир нь тэд хүн ажиллахын аргагүй хортой орчин бүрдүүлдэгт асуудал байгаа юм. Энэ талаар олон судалгаа нийтлэл байдаг бол хамгийн алдартай нь Harvard Business Review сэтгүүлд нийтлэгдсэн Scott Spreier-ын “Хяналтаас гарсан манлайлал” гэх нийтлэл юм. Түүний бичсэнээр хэмнэл тогтоогч төрлийн манлайлагчид нь бусдыг сонсдоггүй, тэд нарт шийдвэр нь хамтын байх учиртай гэдэг талаар яриад ч нэмэргүй. Тэд хамтран ажиллаж буй хүмүүсээ таньж мэдэхийг огт боддоггүй. Зөвхөн даргын байр сууринаас л харьцдаг. Ажилчдынхаа ур чадварыг хөгжүүлэхэд нь тус нэмэр болдоггүй”.
Ийм манлайлагчид харамсалтай нь манайд ч их олширч байгаа. Тэдний боддог зүйл бол ердөө богино хугацааны ашиг. Тэр ашгаа л бодоод байхаар ийм маягийн манлайлагч болж хувирдаг байна. Ийм төрлийн манлайлал газар авахаар сөрөг үр дагаврууд ихээр гардаг. Ёс зүй үгүй болох, аливаа асуудлыг номоор нь шийдэх бус аргалах арга барил хэвийн хэм хэмжээ болж хувирах, хүмүүсийн нэг нэгэнтэй харьцах харилцаа доройтох гээд олон сөрөг үр дагавар бий. Ийм арга барилаар ажиллахаар байгууллагууд урт удаан хугацаанд тогтвортой болж чаддаггүй. Тиймээс урт настай бизнес эрхэлье л гэж бодож байгаа бол хүнээ сургаж ажилчдаа хүндэлсэн орчин бүхий байгууллагыг бий болгох хэрэгтэй гэдэг. Энэ нь амьдралаар нологдсон жам юм.
Comments